Noches sa ijo tanan.
Sugdan ko sa ini na thread an pagpost nan mga balak Kinantilangnon. Jaon na balak sa ubos sinuyat (taghubad/translate) ko sa Cantilangnon tuyo ka tuig na an minagi. Tininguha na mga Butang (Desiderata) ni Max Ehrmann an taytol. Kon jaoy ijo lain pa na mga Kinantilangnon na balak, pakipost rakan dire. salamat. ^^
——-
Tininguha na mga Butang (Desiderata)
ni Max Ehrmann
Padajon sa panaw bisan pa sa kasaba sanan kapaspas sa panahon
sanan hinumdomi uno an kalinaw didon sa kahilom.
Kutob sa mahimo ajaw pagtalaw
Magmabinatiun kaw sa tanan tawo.
Isulti an imo mga kamatuodan sa hilom sanan sa katin-aw,
sanan panalinga sa iban,
kay misan an ngangoy sanan an ignorante,
sila sab, jaoy mga kaugalingon na istorya.
Likaje an mga borara sanan mga mapahitas-on na tawo,
kay sila makasamad sa kayag.
Kon ipareho mo an kaugalingon sa iban,
ma yay puyos ra kaw sanan masakitan;
kay sa tanan higajon jaoy labaw sanan ubos pa sa imo.
Pahemosli an imo mga kalambuan sanan mga plano.
Tutoki an kaugalingong mga tinguha, pero magpaubos.
isa ini ka tinuod na bahandi sa baylo-baylo na jagan sa panahon.
Paghinay-hinay didon sa mga kalihokan;
kay an kalibutan puno sa mga panlimbong.
Pero dili unta makapabuta sa imo an uno man galing na pagkalegdong jaon kaw;
dabo na tawo an naninguha sa taas na kahibayo;
sanan sa misan hain, an kinabuhi puno sa pagpakabayani.
Magmatinud-anon sa kaugalingon.
Hilabina, ajaw pagsalig sa pagbati,
Samot na sa pagkasuspetsoso sa gugma;
kay atubangan sa tanan mga kaaya sanan mawaya an gana,
tuig-tuig ini pareha sa sagbot.
Kuhaa sa kamapaubsanon an tambag sa mga tuig,
Nan hinay-hinaji pagbija an mga butang sa kabatan-on.
Pasuliga an kalig-un sa espiritu kay ini an sagang sa kalit na demalas.
Pero ajaw lisda an imo kaugalingon sa dugyom na mga palandungon.
Dabo kahadlok an natawo sa kahawoy sanan pag-isa-isa.
Likod sa makarajaw na disiplina,
magmatinud-anon kaw sa kaugalingon.
Anak kaw sa kaliyongan,
Na pareha ra sa kakahujan sanan sa kabituonan;
jaoy imo katungod na uno ini kaw.
Klaro man o dili sa imo,
wayay pagduda na an kaliyongan naningkamot gajud pag-abre sa imo.
Ugsa pagmalinawon iban sa Dyos,
misan uno pay imo pagsabot sa Ija,
sanan uno may galing imo mga trinabahuan sanan tinguha,
sa alingasa sanan makalilibog na kinabuhi, pagmalinawon sa imo kayag.
Misan pa sa tanan mga bakak, pangilad sanan nabuak na mga damgo,
maganing pagihapon na kalibutan.
Pagdaya nan pahiyom.
Paningkamot na magmalipajon.
Reposted from Cantilan FB Group
Posted by: Jason Sigfred S. Seril