Mahinumdum gajod ako sa una, gamay pa ako, masin duwa ako nan pusil-pusil iban an mga kabatan-onan sa una sa Barangay Linintian, Cantilan. Mabibo gajod karajaw. Nahinumdum ako na an kontra nam permi mga taga Embarkadero sanan mga taga Magosilom. Mag lanat-lanat, mag-tiruhay, mag-pinukpokay nan puyo nan pusil-pusil. Kun mapuk-pok kaw, aw na manhubag gajod an uyo, man-labag an likod, pero yay gihap labot basta makabayos puk-pok sanan sipa sa kontra payts na.
An amo leader-leader kunu jadto na mga panahon si Taay an ngayan, taga Linintian da gihapon. Jaoy sab amo mga strategy jadto, waya waya pa lagi, amo da kunu mga sundalo, sundalo nan Linintian, Linintian brigade.
Strategy 1.
Duha ka linya na straight, dungan atakehon an mga taga-Embarkadero, an una na linya mu-atake hampan musunod an ikaduha na linya pag-atake, hampan an una na sab mubunot na dajon nan puyo pinuk-pukay na dajon.
Strategy 2.
Mu-atake, hampan pan-snatchon da an “pusil-pusil” nan kontra.
Strategy 3.
Kun dabo an kontra, mangihi, putson an ihi nan plastic selopin, hampan amoy ipan-labak sa kontra. (This is 2nd most effective strategy nan jadto na mga panahon)
Strategy 4.
Dynamita. Malibang or manhanap nan basa pa na tae nan ido, putson nan newspaper sanan plastic, ilabak sa kontra, BOMBS AWAY! Aw na mag-sibyagan lagi dajon sila. (#1 most effective strategy hehehe)
Ay-ay kabibo lam gajod adto na mga panahon, kun an kalaban an mugamit nan strategy 3 sanan 4, aw ok da gihapon, diretso sayom sa suba sa Linintian (Limpyo pa bagan adto na mga panahon).
Nahurot gajod an mga kawahan jadto na panahon sa Baybay, Consuelo, sanan sa Tambis, kay tanhimo nan pusil-pusil. Dabo sab nakakwarta kay an iban na mga kabatan-onan magpahimo dakan sab. Nahimo sab matod sija gamy na negosyo. Tag 10 pesos kun magpahimo kaw imo na an mga lastiko sanan chinese garter na gamiton. An di silencer 20 magpahimo. An mamaligja-ay nan lastiko hurot-hurot sa an ila mga baligja.
Ay-ay kabibo lam gajod. Marajaw gani naka-experience pa ako jaon sa Cantilan. Lahi na man gud an uso kuman, DOTA ALL-STARS naman sa computer. Puno na bitaw nan computer shops sa Cantilan kuman kay kusog an demand. Kun an mga TFC na naka-apil pa nan ini, kun manguli kamo sa ato lungsod, tya dijo, magduwa ta pusil-pusil, hampan mag-pinuku-ay tae!hehe
Bitaw, magkalipay gajod ako kun jaoy ako hikit-an na magduwa pa nan pusil-pusil sa ato lungsod, kun waya na man, kay pas-pas man gajod an panahon, lahi lahi na man uso kuman, maskin mahibay-an lam nan mga kabatan-onan kuman o sa mga musunod pa na mga panahon sa Cantilan na jaoy baja pusil-pusil na kalingawan nan waya pa an mga computer.
Kagana lam kun madajon adto nabasahan ko sa thread sa Barangay FB about sa “museum” ba adto?
Note: Sa waya kahibayo kun unoy pusil-pusil, made of kawajan jaon. An bala binasa na papel, mostly newspaper kay mas hapdos kuno mu-igo sa panit. An iban mugamit sab nan kapaja, balahon.